Tolosaldeko Hitza

Euskal herrien arteko euskal jokoen V. edizioa ekainaren 28an amaitu zen Zuberoan. Idauze Mendin eta Euskal Herria Zuzenean jaialdiaren barnean, Xiba jokoen finala jokatu zuten 20 talderen artean.

Tolosaldeko hiru herri aurkitzen ziren azken txanpa honetan: Ibarra, Asteasu eta Zizurkil.

Bertso, dantza, herri kirol eta jokoak amaitzean Areatzako taldeak lortu zuen lehen postua. Ondoren ordea, eskualdeko hirurak sailkatu ziren. Bigarren postuan Ibarrako taldea geratu zen, hirugarren Asteasukoak eta laugarren zizurkildarra.

Xiba jokoak

Herrien Arteko Euskal Jokoen V. Topaketa apirilean hasi zen Hernanin. Urtero legez, Euskal Herri osoko neska-mutilek euskal kirol eta joko tradizionalekin gozatzeko aukera izan dute, festari ere uko egin gabe. Antolatzaileei dagokienez, Ikastolen Elkarteko kide den Xiba proiektuak antolatzen ditu jaialdiok.

Kirolariek lau multzotan banatutako 14 bat probetan parte hartu behar izan dute. Lehen txandan harri-jasotzea, ingudea, lasto-altxatzea eta musa leudeke; bigarrenean trontza, lokotxa, txingak eta zakua; hirugarrenean toka, xiba, dantza eta egur-pila; eta laugarrenean sokatira. Gero, herrialde bakoitzean beste jokoren bat gehitu zaio zerrendari; Araban bola-jokoa, esaterako.

Zuberoan jokatu zen finalera iristeko 6 herrialdeetan kanporaketa lehiak jokatu ziren. Hauetatik lau lehenak finalerako txartela lortu zuten. Hasieran 24 talderen arteko finala aurreikusten baldin bazen ere, Idauze Mendin 20 talde elkartu ziren; kirola egiteko prest zeuden 300 festazale, hain zuzen ere.

«Tolosarrei erakusteko prest»

Ibarrako taldeko kideak «pozik eta gustura» aurkitzen ziren egindako lanarekin. Horretaz gain bertan aurkitu zuten giroa azpimarratu zuten: «Eguraldi bikaina egiten zuen eta jai giro paregabea zegoen Euskal Herria Zuzenean jaialdian. Jokoetan oso ondo ibili ginen nahiz eta sokatiran nahiko pattal ibili ginen. Ondoren parranda botatzeko aitzakiarik ez zen falta izan hala eta guztiz ere. Antolatzaileek ere oso lan txukuna egin zutela aitortu eta eskertu behar da».

Ez da ahaztu behar eskualdeko beste bi ordezkariek ere lan bikaina egin zutela eta jai giroan hirugarren eta laugarren postua lortu zutela Asteasuk eta Zizurkilek. Lehia izan arren, antolatzaileek argi azaldu zuten bezala, «txapelketaren funtsa ez da talde garaile bat izatea, baizik eta guztiok batzen gaituen kultura eta ohiturak suspertu eta herrien arteko harremana bultzatzea». Hala eta guztiz ere herrien arteko lehia sanoaren islada da Ibarrako entrenatzaile Txantxanen gomendioa: «Tolosarrei hurrengo urtean gurekin ikasten utziko diegula esan nahi diegu».