Tolosaldeko Hitza

XIX. Joxean Tolosa Txapelketako lehen pilotakadei bihar ekingo diete

Klasikoa den pilota txapelketa hasiko da bihar Amezketan, Joxean Tolosa Pilota Txapelketa, eta aurten, 19. urtea da dagoeneko. Ugarteko Tolosa pilotariak Retegiri irabazi zioneko urtea gogoan dute beti txapelketa hau, horren ondorioz jaio zen, hain zuzen. Bihar, hiru mailatan 12 pilotari hurbilduko dira Amezketako frontoira txapelketari hasiera ematera.

16:30etik aurrera gazte eta nagusien arteko hiru partida jokatuko dituzte, eta 22:00etan beste hiru partida izango dira. 16:30ean gazteen norgehiagoka bat eta nagusien arteko bi izango dira, eta 22:00etan gazteen arteko bi neurketa eta nagusien arteko bat. Azken honetan Aranburu zizurkildarra izango da Loiolaren kontra (Elgoibar). Guztira bihar, beraz, eskualdeko bi lagun ariko dira: batetik, Berrobiko Ugartemendia arratsaldean, nagusien mailan, eta bestetik, Zizurkilgo Aranburu, aldiz, gauez eta esan bezala, nagusien mailan ere.

Eskuz banaka izaten da Amezketako Txapelketa hau eta udan zehar jokatzen da. Finala irailaren 14an izango da astebururo jokatzen joan ondoren. Amezketako frontoian jokatuko dira partida guztiak, kadete, gazte nahiz nagusien mailetan. Euskal Herri osotik datoz pilotan jokatzera aurten ere Amezketara.

Final gogoratuena, 1989koa

Joxean Tolosa amezketarrak Retegi II.ari 1989an 22-19 irabazi zion eguna gogoan izaten dute Joxean Tolosa Pilota Txapelketa antolatzen dutenean, bereziki lehenengo urtean, duela 19 urte. Egun, ia punta-puntan daudenak txapelketa honetan ibiliak dira; esaterako, Mikel Belloso (profesionalen mailan) eta Ugaitz Renobales.

Xalton Zabala Zazpi-Itturri pilota eskolako zuzendariak «ilusio handiz» antolatu du beste behin txapelketa, eta beste urteetan bezala, «partaidetza izugarria izango da». Finalean pilotari onenari saria ere banatuko dute, pilotari txapeldun bakoitzari dagokionaz gain. Aurten ere betiko afaria egingo dute txapelketari merezitako amaiera emateko. Bertan, antolatzaile, pilotari nahiz hainbat pilotazale elkartzen dira Joxean Tolosarekin batera. Datorren urtean, hogeigarren txapelketa izango da.