Tolosaldeko Hitza

«Bedaiok bizi gehiago daukala nabaritzen da»

Jon Balerdi (Bedaio, 1971) da Bedaioko Artubi elkarteko lehendakari berria. Urtebetez ariko da beste 9 laguntzailerekin batera. 6 zuzendaritzako batza daude elkar- tean eta urtero aldatzen dute. Guztira, 72 bazkide dauzka Artubik.

Zeinek osatzen duzue zuzendaritza taldea?

Lehendakari ordea Ikerne Maiza da, idazkaria Nagore Maiza; diruzaina Ino Jauregi, almazeneko arduradunak Pako, Patxi, Joxe Mari eta Iñaki dira; bokala Ramon da eta afari-bazkariez arduratzen dena Pili da. Hori da aurtengo taldea, guztira hamar.

Joan den urtean bezala, aurten ere hilabetero gutxienez ekitaldi bat antolatuko duzue.

Bai, otsailean barrikotea egin genuen, martxoan emakumeentzako afari arrakastatsua antolatu genuen (60 elkartu ziren eta oso ekitaldi polita izan zen), eta hilabetero izango dira ekitaldiak.

Bedaioko Mendi Ibilaldia arrakastatsua izan zen. Aurten ere egingo duzue?

Bai, egiteko asmoa dugu, ekainean. 10 gara zuzendaritza taldean, baina atzean beti jendea dugu, eta lagundu egiten dute, noski. Ekitaldi honek, adibidez, lana eskatzen du: antolakuntza aldetik, prentsarekin harremanetan jarri, merkatariei laguntza eskatu behar zaie...

Ekintza berriak ere sortu dituzue.

Gaztetxoen txokoa antolatu nahi dugu: Bedaion jende guztiarentzako zerbait antolatu nahi izan dugu. Ikusten genuen haurrentzako hutsune bat zegoela. Ez dugu ezer zehatzik, baina jokuak eta halakoak egingo ditugu. Tailerrak, eskulanak... asmoa daukagu.

14 ekitaldi gutxienez. Ez da asko?

Lan gehiago da, baina gustura egiten dugu. Ekitaldi guztiak irekiak dira, ez bedaiotarrontzat bakarrik, eta gustura ibiltzen gara. Triptiko bat ere atera behar dugu, egutegi guztia zehaztuz. Webgunea ere berritzen joango gara (www.bedaio.com). Atal berriak ere izango ditu, baina ez da oraindik egin, bidean den zerbait da.

Zuen helburua zein da?

Bedaio ezagutaraztea bai. Badira finkoak diren ekitaldiak: barrikotea, kultur asteburua, harri jaia, festak... Ibilaldia eta azoka berriak ziren iaz eta horiei jarraipena eman nahi zaie. Bedaiok bizi gehiago daukala nabaritzen da, batez ere ibilaldian, hildako gazteen omenez egindako egunean jende asko hurbiltzen da... Jendea, ikusten da ekintza hauetan parte hartzen duela, aitzakia bat behar da denak biltzeko eta jendea oso gustura joaten da, parte asko hartzen du eta astean zehar bakoitzak bere bizia egiten du eta halakoetan jendea mugitzen da.

Diru asko behar duzue hau guztia antolatzeko?

Tolosako Udalak joan den urtean 5.000 euro eman zizkigun, festetarako eta jubilatuen bazkarirako. Diru asko ez dugu behar... Baina gogo, ilusio asko daukagu, elkarlan bat da eta asko gozatzen dugu.