Laskorain ikastolaren bloga

Tolosatik oso oroimen ona eraman dute Bartzelonara Els Picarols
abesbatzako haurrek eta bere arduradunek. Laskorain abesbatzako abeslarien etxeetan igaro duten asteburua gogoan izango dute: kontzertua,elkarbizitza familian, bisitak…
Ostiralean iritsi ziren autobusez Bartzelonatik Tolosara, horrela abeslari tolosarrek maiatzean egin zieten bisita itzuliz, bi abesbatzen arteko elkartrukean. Lagun tolosarren etxeetan izan dira asteburu osoan eta Tolosa eta Donostiako toki esanguratsuenak ezagutzeko parada izan dute.
Lan pixka bat ere egin dute: larunbat arratsaldean entsegua izan zuten eta ondoren bi abesbatzek kontzertua eskaini zuten Santa Klara komentuan Naiara Mintegia eta Laia Jornet zuzendari zirela. Elkarrekin abestu zuten azken kanta eta ondoren opari eta oroigarrien trukaketa izan zen. Igande goiza tolosarren familiekin gozatu ondoren, arratsaldean Bartzelonara itzuli ziren. Laskorain Ikastolak esker bereziak eman nahi dizkio Santa Klarako moja komunitateari, kontzertua egin ahal izateko emandako erraztasunengatik.
ARGAZKIAK

Azken urtetako ohiturari jarraituz, ostiral honetan bazkari mundiala izango dugu Batxiler 2ko ikasle eta irakasleek. Guztira 120 neska-mutil izan ditugu BATX2n, eta gehienak Ikastolan 2 urte zituztela hasi ziren, beraz ikastolako historia bihurtu dira.
Ondo merezitako ( ikasleen %84ak selektibitatera joan dira lehenengo txandan) bazkari honen sukaldariak irakasleak beraiek izango dira. Bizitzako etapa bati amaiera eta beste bati hasiera emateko garaia iritsi zaie, eta gure herrian ohikoa dugun moduan, jatordu batekin elkarrekin ospatuko dugu guztiok. Zorte on!

LASKORAIN IKASTOLAREN EGUN ARRAKASTATSUA
Jaialdi ikusgarria, 1100 lagun bazkaltzen, pailasoak, dantza…

Igandean, izugarrizko giroa izan genuen Ikastolaren egunean.

Urtetik urtera jende gehiago erakartzen duen eguna dugu hau, eta eguraldia lagun, antolaturiko ekintzak primeran atera ziren.

Goizeko 10:30ean Tolosan zehar egindako bizikleta ibilaldiarekin eman genion hasiera egunari.
Jarraian, gurasoek ekarritako tortillak dastatzen genituen bitartean, neska mutilak mailaka antolaturiko jolasetan ibili ziren: herri kirolak, ginkana eta altxorraren bilan.

Eguerdian, haur hezkuntzakoek, Euskal mitología gaitzat harturik prestaturiko Jaialdia erakutsi ziguten. Jaialdi ikusgarria, benetan.
Hauen atzetik, abesbatzaren emanaldia eta antzerkia izan genituen.

Eta bazkaltzeko berriz, gurasoek prestaturiko paella, oilaskoa, izozkia eta kafe goxoa. Izugarria izan zen guraso eta ikasleek egindako lana, bazkalorduan elkartu ginen 1100 bazkaldarrek horren ederki bazkaldu ahal izateko.

Arratsaldean berriz HIPO eta TOMAX pailasoen txanda izan zen. Eta hauen atzetik, Gurasoentzat antolaturiko Jolasak. Inoiz baino guraso gehieagok eman zuen izena eta ezin izan genituen joku guztiak bukatu.
Eta jarraian, UNSAIN anaien eskutik DANTZALDIA!
Aze izerdiak!!!

Eskertzekoa benetan, egun hau horren borobila atera zedin lana egin zuten ikastolako ikasle, guraso eta langile taldearen jarrera!

ARGAZKIAK

Igande honetan ospatuko da Laskorain Ikastolaren eguna.
Urtero bezala, ekintza ugari antolatzen ari gara egun eder bat igarotzeko.
Honela, goizeko 10:30ean azken urte hauetan antolatzen den BIZIKLETA IBILALDIAREKIN emango diogu hasiera egunari.
Jarraian hamaiketakoa eskeiniko da Usabalen eta umeentzat joku ezberdinak antolatuko dira: herri kirolak, ginkama eta altxorraren bila.
Ikasleek prestaturiko emanaldi ezberdinekin jarraituko dugu: haur hezkuntzakoen dantzak, abesbatza eta antzerkia.
Aurten ere, gurasoek Ikastolako patioan prestaturiko paella dastatzeko aukera izango dugu bertan bildutakook.
Urtetik urtera arrakasta handiagoa du bazkariak, eta aurten markak hautsi ditugula esan genezake, izan ere 1100 bazkaldar elkartuko baikara paella eta oilaskoa dastatzera.

Bazkal ondoren Kazkabarrako begiraleen eskutik TAILERRAK izango dituzte txikienek eta jarraian HIPO ta TOMAX pailasoen emanaldia izango dugu.

Gurasoentzat JOLASAK antolatu ditugu ondorenerako.
Eta amaitzeko UNSAIN ANAIAK taldearekin dantzaldia izango dugu

Lerro hauen bidez Ikastolaren lagun guztiak festan parte hartzera gonbidatu nahi ditugu.

BATEL TOPAKETA

Larunbatean, Tolosako 3. batel topaketa ospatu zen.
Laskorain Ikastolako ikasleak bikain aritu ziren eta emaitza ezin hobeak eskuratu zituzten.
DBH mailan lehenengo postua eskuratu zuten, Hirukide, Orixe eta Villabonako ikastolarekin lehiatu ondoren.
Batxilergokoen txandan, Laskorain Ikastolako bi talde aurkeztu ziren eta lehen bi postuak lortu zituzten.
Finala ikastetxe bereko bi taldek jokatzerik ez zutenez, hirugarren denbora egin zuen Hirukide taldearen aurka lehiatu ziren Laskoraingoak eta hirugarren urtez, Laskoraingoak izan ziren Banderaren jabe.
Zorionak guztioi!! ARGAZKIAK