Tolosaldeko Hitza

Sanjoanak hastear badira ere, Tolosako Udalekoak hurrengo asteari begira ere ari dira dagoeneko. Izan ere, gaur goizean aurkeztu dute hilaren 26tik 28ra ospatuko den Tolosandblues jaialdia. Aurtengoa 4. edizioa izango da, eta oraingo honetan ere, «taldelanari esker» prestatu dute egitaraua. Iñigo Martin arduratu da programazioaz eta jaialdia iragartzen duen kartela egiteaz berriz, Jon Gaztañaga. Bestalde, ekimenarekin bat egin dute Ezpeleta elkartekoek eta Fronton kafetegikoek ere.

Andoni Iturzaeta kultur zinegotzia ere gaur Fnac-en izan da, ekimaren aurkezpenean, eta bere hitzetan, «Udalaren asmoa da orain arte, lau urte hauetan egindako lanari sendotasunez heustea». Hori dela eta, aurrera begira, luzera ere jarraitzea espero dutela azaldu zuen.
Oraingo honetan, berrikuntza gisa, film batekin emango diote hasiera Tolosanblues-i. Zine Klubeko emanaldien amaierak eta Tolosandblues-en hasierak bat egingo dute.
Win Wedners-en The soul of a man filma prestatu dute hilaren 26rako. Hemen, zuzendariakbluesaren munduan sakratua eta profanoa denaren artean dagoen tentsio dramatikoa erakusten du, bere hiru artista gogokoenen musika eta bizitza aztertuz: Skip James, Blind Willie Johnson eta J. B. Lenoir. Hein batean historikoa, eta beste hein batean alderdi pertsonalean sakontzailea den pelikulak musikari eskainitako bizitza horiek nolakoak izan ziren erakusten du, dokumental gisa.